ភ្នំពេញ៖ ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា សម្តេចកិត្តិសង្គហបណ្ឌិត ម៉ែន សំអន បានអញ្ជើញជាអធិបតីក្នុងកម្មវិធី The Voice Cambodian រដូវកាលទី៣ វគ្គផ្តាច់ព្រ័ត្រកាលពីយប់ថ្ងៃអាទិត្យទី០១ ខែតុលា ឆ្នាំ២០២៣ និងបានប្រគល់ពានរង្វាន់ជ័យលាភី ជូនកញ្ញា លឹម សេរីហាន់នីកា ដែលជាកូនក្រុមរបស់Coach ពេជ្រ សោភា។

ម្ចាស់ជ័យលាភី លឹម សេរីហាន់នីកា បានប្រកួតប្រជែងក្នុងវគ្គផ្តាច់ព្រ័ត្រ ជាមួយនឹងបេក្ខជន និងបេក្ខនារីចំនួន៣រូប ដោយមានលោក សាល បាទី កូនក្រុមរបស់Coach ឆន សុវណ្ណរាជ កញ្ញា គឹម សុវណ្ណ កូនក្រុមរបស់Coach ឱក សុគន្ធកញ្ញា និងលោក សួន សុវណ្ណចន្នី កូនក្រុមរបស់Coach ណុប បាយ៉ារិទ្ធ។

កម្មវិធីនេះធ្វើឡើងអស់រយៈពេលជិតកន្លះឆ្នាំមកហើយដោយគិតចាប់ពីខែមេសា ឆ្នាំ២០២៣ ដែលមានបេក្ខជន បេក្ខនារីជាច្រើននាក់ចូលរួមប្រជែងប្រកួត។

ម្ចាស់ជ័យលាភី The Voice Cambodia រដូវកាលទី៣ កញ្ញា លឹម សេរីហាន់នីកា ជាកូនក្រុមរបស់ Coachពេជ្រ សោភា ដែលទទួលបានតែកៅអីមួយប៉ុណ្ណោះពី Coach សោភា។

លឹម សេរីហាន់នីកា ធ្លាប់ប្រកួតប្រជែងនៅក្នុងកម្មវិធីប្រឡងចម្រៀងជាច្រើនកម្មវិធីមកហើយរបស់ទូរទស្សន៍ហង្សមាស ប៉ុន្តែបរាជ័យ ទើបតែទទួលបានជ័យជម្នះនៅក្នុងកម្មវិធី The Voice Cambodia រដូវកាលទី៣ ដោយទទួលបានពានមួយ ប្រាក់រង្វាន់ចំនួន១០០លានរៀល។ ចំណែកឯបេក្ខជន បេក្ខនារី ដែលមិនបានលើកពានបានទទួលថវិកាឧបត្ថម្ភចំនួន ៤លានរៀល ជាការលើកទឹកចិត្តផងដែរ។

គូសបញ្ជាក់ថា ម្ចាស់ជ័យលាភី The Voice Cambodia រដូវកាលទី១ ឆ្នាំ២០១៤ បានទៅលើ លោក ប៊ុត សីហា នៅរដូវកាលទី២ ឆ្នាំ២០១៦ គឺលោក ថែល ថៃ៕